Redacción

A Fundación Via Galego vaille reclamar formalmente ao Ministerio de Industria que se conceda a Galiza un novo múltiplex, para permitir a emisión no noso país das televisións portuguesas en formato dixital. Carlos Callón, como presidente desta Fundación promovida pola Mesa pola Normalización Lingüística, anunciouno nunhas Xornadas sobre Lingua e Usos celebradas na Reitoría da Universidade da Coruña, onde tamén indicou que se dirixirán ao Goberno galego para que realice a negociación correspondente co Ministerio.

A Fundación Via Galego vai basear a súa reclamación na Carta Europea das Linguas Rexionais ou Minoritarias, un tratado internacional promovido polo Consello de Europa e asumido polo Estado español no ano 2001. Este tratado, no seu artigo 11 parágrafo 2, sinala que se debe garantir a “recepción directa de emisións de radio e televisión de países veciños nunha lingua usada en forma idéntica ou similar a unha lingua rexional ou minoritaria”.

“Nós temos un problema semellante ao de Cataluña, Valencia e as Balears, só que non dunha comunidade autónoma colindante, senón dun Estado colindante. Precisamos ese múltiplex tamén por razóns culturais. O Estado español ten obriga de outorgalo e o Goberno galego debe negocialo”, sinalou o presidente da Mesa e da Fundación Via Galego.