Redacción/Lugo

O Bloque Nacionalista Galego proponse lograr “que Monforte volva converterse no nó básico de comunicación ferroviaria de Galiza que foi no seu momento”. No transcurso dunha conferencia sobre Os logros e os retos do nacionalismo galego no Estado, celebrada no salón de actos do Centro da Terceira Idade de Monforte, diante de máis dun cento de persoas, a cabeza de lista do BNG ao Congreso, Paz Abraira, e o actual portavoz do BNG en Madrid, Francisco Rodríguez, destacaron que o tren é para o BNG “unha aposta de futuro para Monforte”.

A candidata nacionalista, Paz Abraira, lembrou que en Monforte chegaron a traballar no sector ferroviario unhas 7.000 persoas e insistiu na necesidade da “revitalización do ferrocarril” como “elemento fundamental para o despegue económico da comarca”. Neste sentido, a cabeza de lista do BNG destacou a “importancia vital do porto seco” e a “posición privilexiada de Monforte no mapa ferroviario galego”. “A principal vía de saída de mercadorías de Galiza será a través de Monforte e Ponferrada”, destacou Paz Abraira, e iso, dixo, “é algo que Monforte ten que aproveitar nos vindeiros anos”.

Paz Abraira, que defendeu o “un ferrocarril que sirva para o transporte tanto de mercadorías como de pasaxeiros”, propuxo a creación dunha rede de ferrocarril de cercanías entre as principais vilas da provincia de Lugo. A cabeza de lista do BNG ao Congreso, afirmou que “a provincia ten as características apropiadas para que funcione un tren de cercanías de Monforte a Sarria, Lugo, Ourense, Quiroga e O Barco”. Paz Abraira indicou que esta proposta do BNG é “unha aposta polo tren e polas comarcas do interior” e destacou a capacidade do ferrocarril para a “vertebración da provincia”. Reclamou, neste sentido, “mellores servizos, máis frecuencias e conexións áxiles e útiles” tanto para as comunicacións interiores dentro de Galiza como para as conexións coa Meseta e insitiu na necesidade tamén “dunha modernización dos convois, dos máis vellos de todo o Estado”.

“A verdadeira batalla será a dos servizos”

O portavoz do BNG no Congreso, Francisco Rodríguez, destacou, pola súa banda, que “o debate sobre o ferrocarril para a provincia de Lugo non é só o da chegada do AVE” porque “de pouco vale que os AVE atravesen a provincia camiño da Coruña se non paran en ningún sitio e, polo tanto, non dan servizo ás distintas poboacións”. Por iso, insistiu, “é preciso que a batalla do tren non sexa só un debate de infraestruturas, senón tamén de servizos”. Francisco Rodríguez indicou que a liña A Coruña-Lugo-Monforte-Ponferrada é das máis “abandonadas” de todo o Estado e defendeu a súa “utilidade” para o tráfico de mercadorías, reclamando un “tren mixto” para esta liña.

Lograr a chegada do AVE antes de que remate esta lexislatura

Pese a centrarse na creación dunha rede de cercanías e no tráfico de mercadorías, Francisco Rodríguez e Paz Abraira non quixeron deixar de referirse tamén ao AVE e afirmaron que “para Monforte é prioritario que o AVE esté operativo a máis tardar no ano 2012 tanto para a conexión con Ourense como coa Coruña para garantir por unha banda a conexión con Madrid e por outra a articulación co resto das cidades galegas para que Monforte non quede relegada nas previsións da chegada do tren de alta velocidade igual que pasou coa rede de autovías”.

A utilidade do BNG en Madrid

O portavoz do BNG no Congreso, Francisco Rodríguez, destacou a “capacidade de interlocución demostrada polo BNG en Madrid na lexislatura que remata” e explicou que o BNG logrou incrementar os Orzamentos do Estado en 200 millóns de euros (30 millóns de euros no ano 2006, 62 millóns de euros no ano 2007 e 104 millóns neste ano 2008). “Galiza, grazas ao peso e á presión do BNG en Madrid, pasou de recibir o 6% dos Orzamentos do Estado no ano 2004 a ter hoxe o 8%, máis de 2.000 millóns de euros para este ano 2008”, destacou Francisco Rodríguez.

Francisco Rodríguez, que leva dende o ano 1996 como portavoz do BNG no Congreso, insistiu na súa intervención na “utilidade do BNG en Madrid” e afirmou que “o obxectivo desta volta é acadar representación no Congreso pola provincia de Lugo para que os cidadáns de lemos teñan un interlocutor directo en Madrid a través de Paz Abraira e de Severino Rodríguez”. O alcalde monfortino figura de número dous na candidatura do BNG ao Congreso.

Paz Abraira explicou que o Bloque Nacionalista Galego aspira a lograr nas vindeiras eleccións de marzo representación por primeira vez no Congreso dos Deputados pola provincia de Lugo. “Queremos incrementar a representación nacionalista en Madrid porque máis forza do BNG en Madrid é máis forza de Galiza no Estado”, resumiu a candidata do BNG pola provincia de Lugo. “É hora que Lugo teña por primeira vez un deputado do BNG no Congreso para levar alí os problemas de comarcas como Lemos. E os cidadáns de Monforte tedes a garantía de que teredes liña directa en Madrid a través de Severino Rodríguez”, prometeu.