Xosé Manuel Piñeiro, presentador

Acompáñenos é o novo programa co que Xosé Manuel Piñeiro chega aos fogares dos galegos para transmitir historias alentadoras e cheas de optimismo. Nesta nova etapa compatibiliza radio e televisión, dous medios nos que se sinte como na casa. Declaradamente showman admite que se atopa cómodo neste novo rexistro.

Amparo Rodríguez Ojea

-Se pecha os ollos, ¿onde lle gustaría estar?
-En Canadá ou no Brasil que nunca estiven. Tamén me apetece Xapón. Gústame moito viaxar aínda que o avión fáiseme costa arriba. En xeral déixome sorprender, o primeiro que fago cando chego a un país ou a unha cidade nova é patear as rúas, entrar en contacto co día a día da xente, coñecer o seu ritmo de vida e empaparme da súa cultura. Os espectáculos, os museos e os monumentos déixoos para despois. Fíxate, o Louvre visiteino a terceira vez que estiven en París porque me gusta tanto a rúa e a xente que sempre lle dou prioridade.

-Radio, televisión, espectáculos...Cal é o medio no que máis desfruta?
-En todos por igual. Eu son showman desde que nacín.

-Acaba de estrear programa. Defínao.
-É un programa fantástico para xente fantástica. É un programa de vida, de compartir moita vida.

-Que ten Piñeiro para dar?
-Sinceridade, emoción e espontaniedade.

-Que lle aporta o seu traballo a vostede?
-O traballo apórtame todo, para mín é fundamental. Teño a sorte de traballar no que quero, incluso non me gusta coller vacacións moi prolongadas, prefiro espacialas. Érgome polas mañás con ganas de facer radio, de traballar, de facer algo.

-Cales son os elementos básicos para que un programa teña éxito?
-É moi difícil de definir. Creo que estar no sitio axeitado no lugar axeitado é a clave do éxito. Depende de moitos factores, de orientalo a un público definido, do horario de emisión, da competencia... Si por éxito se entende a audiencia, neste intre hai que fiar moi fino.

-E chegou o cambio... ¿por que Luar sí e Supermartes non?
-Non se trata de comparar. Penso que Supermartes cumplíu unha etapa estupenda na historia da Televisión de Galicia e a un ano e medio vista creo que rematou no momento que tiña que rematar, nun bo momento. De Luar penso que sigue tendo sentido un programa así nunha televisión pública e as cifras de audiencia así o amosan. Non me gusta falar de cambios políticos, gústame falar do meu, da miña profesión.

-De volta na televisión da súa terra, cambiou algo na súa ausencia?
-Sí, de entrada a estética. Era lóxica unha renovación e que se cambiase a imaxe corporativa e creo que sí se fixeron moitos intentos de chegar a outros públicos e, como todo na vida, uns máis acertados ca outros. Na televisión hai que estar experimentando sempre e na radio tamén.

-Cal é o seu papel en Punto Radio?
-Nestes intres, o que se espera de mín na radio é que faga un programa divertido e participativo.

-En Punto Radio de doce a dúas tódolos días Protagonistas Galicia SuperPiñeiro. Dalle sorte o de SuperPiñeiro?
-O certo é que o único que me trouxo este nome foi alegrías e como nos parecía un bo reclamo publicitario decidimos conservalo. Estoulle moi agradecido a Superpiñeiro.

-Que tal neste novo rexistro?
-Moitos se sorprenderon deste novo rexistro, a mín gústame. Eu disfruto moito do día a día e deste programa estou disfrutando moito aínda que sí me gustaría tamén experimentar e seguir descubríndome. Dende que teño uso de razón estou nun esceario e o que teño claro é que me gusta traballar aquí.

-En que lle gusta invertir o seu tempo de lecer?
-En estar coa xente, eu son un conversador nato. Gústame moito charlar, pasear, ir a espectáculos, viaxar... Vexo televisión porque é a miña obriga.