|
Alfredo Suárez Canal, conselleiro de Medio Rural
Guillermo Rodríguez Fernández
A Consellería do Medio Rural adquiriu
especial protagonismo ao longo da vaga de lumes
sufrida por Galiza durante a primeira quincena do
mes de agosto. Todas as olladas se dirixían ao
titular desta carteira, Alfredo Suárez Canal, polo
quixemos poñernos en contacto con el para que nos
dese a súa opinión sobre o acontecido. Este foi o
resultado da entrevista.
 -
Vostede está considerado como un dos pesos pesados
no actual goberno. ¿Nalgún momentos lle fallaron as
forzas diante da catástrofe vivida?
- En situacións complexas coma as que viviu o país
durante 11 días, con algunha xornada na que se
rexistaron picos de 300 lumes, cunhas condicións
climatolóxicas moi desfavorables e unha actividade
criminal desforada, o primordial é concentrarse no
control da situación e na coordinación dun operativo
o máis eficaz posible. En circustancias semellantes,
o traballo para poñer coto á situación vivida
despraza calquera outra consideración de tipo
persoal.
- A súa consellería é unha das máis importantes, se
temos en conta o abandono do medio rural galego. Os
últimos lumes, supoñemos, rompéronlle bastante o
programa de acción previsto ¿Qué supuxo esta
catrástrofe recente sobre os proxectos a medio e
longo prazo?
- A recente vaga de incendios evidenciou o gran
déficit en ordenación do monte e políticas forestais
que vimos arrastrando desde hai demasiado tempo. É
verdade que a Consellaría do Medio Rural empezou a
súa andadura coas miras postas en corrixir
paulatinamente esta situación, mesmo fomentando o
diálogo e o consenso entre todos os axentes dos
sectores implicados para tratar de racionalizar os
usos produtivos dos montes e dar solución aos seus
problemas estruturais. Non podemos deixar de lado,
tal e como se viña facendo ata agora, o enorme
potencial forestal do país. Neste sentido, a
Consellaría do Medio Rural está a elaborar un Plan
Decenal para a Reestruturación do Monte Galego, que
contempla medidas a curto, medio e longo prazo, coas
que se pretenden acadar unha nova situación
estrutural do monte galego e afianzar unha nova
dinámica forestal.
- Os cidadáns pregúntanse ¿por que tanto lume en
pouco máis dunha semana e agora tan pouco? Vostede
¿que opina? ¿Existen datos fiables que expliquen as
verdadeiras causas? ¿Podemos seguir falando de trama
organizada?
- Desde a Consellaría do Medio Rural nunca se falou
de trama organizada, en todo caso, hai que destacar
que a tipoloxía dos lumes da primeira quincena de
agosto resulta novidosa se se compara cos incendios
rexistrados anteriormente. Falamos dunha actividade
incendiaria encamiñada a facer dano e crear alarma
social, no sentido de que os lumes se iniciaban en
lugares estratéxicos, preto de redes viarias
importantes e de núcleos habitados, con varios
focos por incendio e en zonas de difícil acceso para
os equipos de extinción, o que dificultaba o
traballo do operativo antiincendios e nos obligaba a
concentrar os esforzos en protexer as vivendas e as
persoas deixando o monte nun segundo plano. Nós non
falamos de trama organizada, pero tras os evidentes
indicios de intencionalidade na orixe dos lumes,
falamos xa
desde o primeiro día de actividade criminal, poñendo
énfase na necesidade de perseguir e investigar este
tipo de delitos e a aqueles que os comenten. Foi
precisamente esta actividade incendiaria concentrada
en determinadas zonas, unida a unhas moi
desfavorables condicións metereolóxicas, con
temperaturas moi altas e forte vento do nordés, o
que propiciou que se
producira a situación de crise vivida entre o 4 e o
15 de agosto. Toda vez que a metereoloxía mudou e,
afortunadamente, se produciu un descenso nesa
actividade criminal, a situación en canto a número
de lumes está agora incluso
por debaixo da normal comparada con estos mesmos
días en anos anteriores. Sen embargo, non podemos
esquecer que a tempada de alto risco de incendios
aínda non rematou, polo que temos que seguir alerta
e co dispositivo preparado para evitar que a
situación se volva a repetir.
- ¿Como están nestes momentos as relacións entre a
Conselleria de Medio Rural e os sectores afectados
polo lume recente: concellos, labregos, industrias
madereiras...?
- En primeiro lugar, vaia por diante o meu
agradecemento a todos aqueles que dalgún xeito
colaboraron para poñer freo a situación excepcional
que nos tocou vivir. Durante ese período tanto os
labregos, aportando tractores e cisternas, como as
empresas forestais, con maquinaria pesada, como os
alcaldes, que na maioría dos casos, utilizaron os
medios dos que dispuñan, uniron os seus esforzos
aos dos efectivos do Servizo de Extinción de
Incendios. Unha vez rematada a crise, desde a
Consellaría do Medio Rural estamos a valorar polo
miúdo todas as consecuencias, co obxectivo de
motivar actuacións decididas para evitar no futuro
situacións similares, e para poñelas en marcha
contaremos con todos os axentes dos sectores
implicados, a través dos foros de diálogo que xa
tiñamos establecidos e buscando o máximo grao de
consenso posible. Neste sentido, recentemente vén de
convocarse e celebararse xa unha ruenión da Mesa da
Madeira e en Breve se convocará o Consello Forestal.
- Hai algo que nos parece unha contradicción: por
unha banda vostede reivindica, entendemos que con
acerto, unha política de asentamentos poboacionais
no rural; por outra banda, a actual Lei do Chan
restrinxe esaxeradamente as posibilidades de poder
edificar, aínda en núcleos chamados urbanizables
¿Como entende vostede este asunto? ¿Está prevista
algunha intervención para arranxalo?
- Desde a Consellaría do Medio Rural xa temos
apuntado en anteriores ocasións á necesidade de
cambiar a Lei do Solo para corrixir os
desequilibrios que nesta materia se están a producir.
Neste sentido, consideramos prioritario unha maior
ordenación do territorio que evite a dispersión
poboacional pero que garanta a supervivencia dos
núcleos rurais. |
