Emilio Pérez Touriño, presidente da Xunta de Galicia

Guillermo Rodríguez
Logo de nove meses á fronte do novo Goberno galego, quixemos manter unha conversa co presidente da Xunta de Galicia, Emilio Pérez Touriño, para facer unha breve valoración deste tempo e coñecer como quere enfilar o futuro dende o despacho presidencial de San Caetano. Isto foi o que deu de si a conversa.

-Logo de cáseque un ano á fronte da Xunta de Galicia, ¿que foi o que mudou e que aínda non se puido cambiar respecto ao Goberno anterior?
- É evidente que cando un partido elabora un programa electoral é porque hai moitas cousas que pretende cambiar e mellorar, e a nosa aposta, recollida no acordo que sustenta o pacto de Goberno, inclúe medidas para poñer en marcha ao longo de toda a lexislatura. Pero podo dicir que estou satisfeito do levado a cabo ata o momento, porque penso que se sentaron as bases do cambio da acción de goberno.
Fundamentalmente podemos destacar, neste sentido, o marcado xiro social e polo emprego dos últimos orzamentos xerais da Xunta para 2006. Por outra banda, cabe destacar os proxectos de lei que serán levados ao Parlamento este mesmo semestre para garantir a transparencia en todos os procesos da administración, como é o caso da adxudicación de subvencións, a publicidade institucional en medios de comunicación ou as propiedades dos altos cargos. E o que máis me preocupa: creo que podo afirmar que conseguimos poñer no centro da nosa atención os problemas dos galegos; a sanidade, a educación e o emprego son as prioridades do goberno que presido.

É evidente que o Partido Socialista e o BNG se fundamentan en ideoloxías diferentes, pero en ambos casos con concepcións progresistas que fan posible unha aposta común.

- Describa os eixos definitorios da nova acción de goberno.
- Por enriba de todo, quero primar o seu carácter social dende todos os puntos de vista. É dicir: quero que o goberno sexa para a cidadanía e dende a cidadanía. Así pois, por un lado son fundamentais as medidas destinadas a cubrir as principais demandas dos cidadáns, como posibilidades de emprego e acceso aos servizos públicos en condicións reais de igualdade, á marxe da situación económica, social ou territorial de cada quen.
Do outro lado, están as medidas que tomamos para garantir a transparencia no Goberno e que farán posible que os cidadáns, saiban en todo momento o que se está a facer dende a Xunta de Galicia, con criterios de equidade e igualdade. Así pois, eu destacaría esta aposta que fixemos, plasmada nos orzamentos xerais da Xunta para 2006, nos que adaptamos medidas para dar conta á cidadanía de a onde vai cada partida. Tamén é moi importante a iniciativa de publicar en Internet, a partir de agora, as subvencións e convenios que asine o Goberno galego. Agora os cidadáns saberán en todo momento a onde van os cartos da Xunta, que son os cartos de todos.
Por outra banda, e así o constatan tamén os novos orzamentos, estamos a facer unha aposta firme pola modernización de Galicia, porque só traballando nesta dirección podemos conseguir incrementar a nosa produtividade, o que nos permitirá ser competitivos nun mercado globalizado que se vai especializando progresivamente. Por iso imos facer un investimento inédito na historia da nosa Comunidade Autónoma na educación e na innovación.

- Das relacións cos seus socios de goberno, ¿cales son as cuestións de fondo nas que lle resulta máis difícil coincidir?
- A xestión diaria das competencias que lle corresponden á Xunta de Galicia non supón problema algún. Sempre hai unha posta en común das actuacións que se van facer para a consecución dos obxectivos que conxuntamente plantexamos no acordo que sustenta este Goberno.
É evidente que o Partido Socialista e o BNG se fundamentan en ideoloxías diferentes, pero en ambos casos con concepcións progresistas que fan posible unha aposta común. Iso é o que estamos facendo, tal e como nos encomendaron os cidadáns a través das urnas. E afirmo con satisfacción que somos capaces de integrar un goberno único, cun único presidente.

- Unha posible diferencia de fondo no plantexamento dun novo Estatuto, ¿que consecuencias podería acarrexar ás relacións do bipartito?
- Dende o primeiro momento no que se empezou a abordar a reforma estatutaria deixei ben claro que a miña intención é que os grupos parlamentarios teñan todo o protagonismo. O Parlamento é a indiscutible tribuna na que se deben desenvolver os debates sobre o Estatuto, porque é a institución que representa a soberanía cidadá e o foro máis axeitado para acoller as negociacións. Así pois, a miña intención é que o debate estatutario se desenvolva polos cauces que se ten que desenvolver. Os cidadáns galegos contan cun goberno sólido e estable, que deberá seguir cumprindo co seu deber con independencia das diferencias de opinión dos distintos partidos. Temos a obriga de saber diferenciar, e así traballaremos.

Teño o firme convencemento de que pode ser posible recuperar o espírito dos Pactos do Hostal que fixeron posible o Estatuto que hoxe temos.

- Os medios falan de que se o señor Núñez Feijóo terá as mans libres á hora de negociar o novo Estatuto, pero ¿vostede non vai estar “pendente” do que digan dende Madrid?
- O día en que tomei posesión como presidente da Xunta comprometinme a traballar sempre no interese do común dos galegos, á marxe das súas preferencias políticas. A asunción dun cargo coma este implica poñer por diante de todo o interese dos cidadáns, e non o do partido.

- Dende a peneira apostamos pola defensa da lingua, da cultura, da economía e dos costumes deste país. ¿Como vai apostar o PSdeG para que estes sinais de identidade non esmorezan?
- Cada un dos puntos que acaba de mencionar están recollidos no acordo de goberno asinado polos dous partidos que conforman a nova Xunta. Todos eles requiren dunha actuación transversal por parte do Goberno autonómico que implique a todos os departamentos. Queremos que a voz de Galicia sexa oída en todos os planos. Isto significa ter en conta o plano literal, o do uso do galego, e tamén o plano figurado, o do noso peso en España e Europa á hora de defender os nosos intereses.
Creo que nos dous ámbitos empezamos a traballar con forza, e a nosa intención é seguir neste liña, por suposto. Así, agora a Xunta ten unha Secretaría Xeral de Política Lingüística que depende directamente da Presidencia e que ten como obxectivo fundamental a posta en marcha do Plan Xeral de Normalización da Lingua Galega, que foi aprobado xa en 2004 por unanimidade de todos os grupos parlamentarios sen que o anterior goberno decidise desenvolvelo. Neste sentido, impulsamos o uso da nosa lingua autóctona en Bruxelas e iniciamos un cambio na política exterior de Galicia que conduza á nosa plena participación nos debates europeos e mundiais nos que teñamos intereses.
Con respecto ao noso papel no conxunto de España, dende o primeiro momento a nosa principal preocupación foi impulsar, xa antes de que rematase 2005, o proceso de reforma estatutaria. Convencidos de que se trata do mellor instrumento para avanzar no autogoberno e evolucionar dentro da España plural que foi posible gracias ao Estado das Autonomías, temos as miras postas na consecución dun novo Estatuto consensuado por todas as forzas políticas galegas. Teño o firme convencemento de que pode ser posible recuperar o espírito dos Pactos do Hostal que fixeron posible o Estatuto que hoxe temos, e que poderemos conxugar a defensa da nosa identidade nacional co principio inexcusable de solidariedade interterritorial.

O executivo  galego está comprometido con Vigo, queremos unha gran área metropolitana do sur.

- Paco Vázquez deixou a Alcaldía da Coruña; en Vigo non houbo entendemento cos nacionalistas e os populares fixéronse coa Alcaldía. ¿Como ve, para o seu partido, estas dúas cidades clave para as próximas eleccións?
- Polo que respecta á Coruña teño plena confianza en que a cidadanía saberá ter en conta o inxente traballo desenvolvido polo anterior alcalde e o Grupo Municipal Socialista ata o momento. É ben certo que a figura de Francisco Vázquez ten un gran carisma e, polo tanto, un tirón indiscutible. Pero creo que os coruñeses son conscientes de que o labor á fronte dun goberno municipal corresponde a un equipo, que agora ten á fronte a Javier Losada e que continuará traballando como a cidade herculina merece.
Con respecto a Vigo, todos sabemos da complexa situación política que vive esta cidade dende hai anos. Vigo está chamada a ser o motor do crecemento económico de Galicia do século XXI e tamén o eixo da Eurorrexión Galicia-Norte de Portugal. A Xunta de Galicia está a facer unha clara aposta neste sentido para que este afán se convirta nunha realidade. Non obstante, e a falta de candidatos definidos para esta Alcaldía, paréceme prematuro apuntar cal será o destino da cidade olívica nas municipais de 2007.

- Área Metropolinata ou consorcio, ¿por cal aposta o señor presidente? ¿Non teme que esta discusión lles prexudique nas próximas eleccións municipais?
- O executivo  galego está comprometido con Vigo, queremos unha gran área metropolitana do sur, unha gran área para Vigo, queremos máis e mellor área metropolitana. A decisión da Consellería de Presidencia de retirar a proposta inicial é unha mostra de xenerosidade e de vontade política de levar a cabo o proceso dende o consenso e o diálogo.
O fundamental é que hai unha vontade do Goberno de apostar por Vigo e de atopar a mellor forma de modelo territorial para a área viguesa. Esa é a clave. O importante e que por parte do goberno galego hai unha disposición clara de liderar un proceso en diálogo, acordo e consenso cos ámbitos locais da área Sur de Galicia sobre cal debe ser a mellor formulación para crear esa  gran área que o sur precisa.