María Dolores Rodríguez, Presidenta do Consello da Xuventude

Texto: Antón Fernández Escuredo
Foto: Miguel Penas

-Que función ten o Consello da Xuventude?
-O seu obxectivo fundamental é representar á xente moza diante da administración autonómica, sobre todo á xente moza que está asociada. Estamos formados por entidades xuvenís de ámbito autonómico, creadas por lei.Tamén temos actividades propias que podan ser de interese da mocidade en todos os ámbitos imaxinables, comezando pola saúde, igualdade, de xénero, medio ambiente, novas tecnoloxías, comunicación, intercambio con outros países da Unión Europea.

-Hai a idea na sociedade de que a xuventude non está moi implicada en proxectos asociativos, que simplemente está como consumidora...
Eu creo que a visión que ten a sociedade da xuventude é tremendamente negativa, que os medios de comunicación axudan moito a estender esta visión negativa. Estou xeneralizando, non todos os medios son iguais. Só saímos nos medios por noticias negativas, eu sempre digo que somo noticias polos botellóns que se fixeron en toda España pero non fomos portada, por ser mozos, cando limpamos o chapapote do Prestige. Fomos portada igual que foi moita outra xente.

-O problema máis importante da xuventude na Galiza é o traballo. Que facedes ao respecto?
É un tema moi complexo, ao cal desde o Consello da Xuventude non lle podemos dar unha solución. Son os poderes públicos e as administracións os que teñen a capacidade de executar políticas para que non haxa emigración. Nós o que facemos é apuntar posíbeis solucións, mais alá diso pouco podemos facer. Si que é certo que comezamos a introducir, desde hai dous anos, a filosofía emprendedora.

-Na renovación dos cargos do Consello houbo certa polémica pola presenza de entidades preconstitucionais...
-Fíxose dunha situación de normalidade algo que parece que non é tan normal. O Consello da Xuventude de Galicia está formado por todas as asociacións de caracter autonómico e xuvenil que cumpren unha serie de requisitos. Neste senso todos os que forman parte do Consello cumpren estes requisito porque senón non estarían. Non só os que marca a nosa propia lei, senón os que marca a Constitución e as leis xerais. Entón dicir que hai asociacións preconstitucionais dentro do Consello da Xuventude de Galicoa paréceme que é ter un descoñecemento absoluto da realidade.
En concreto isto se dicía pola OJE (Organización Juvenil Española), que si que é certo que ten unha memoria dun determinado tempo que se asocia ao franquismo, foi a organización xuvenil do franquismo e iso eles tampouco o esconden porque é a súa historia. A OJE para nada é unha organización preconstitucional, é unha organización xuvenil que traballa con xente moza en Galicia e paréceme que iso é tan respectable como poda ser calquera outra organización do Consello da Xuventude. E por iso forman parte do Comité Permanente.
Con respecto á composición do Comité Permanente, pois hai moitas organizacións xuvenís, de diferentes ideoloxías, que traballan en ámbitos diferentes, e iso é a pluralidade. Ou ao menos así a entendo eu. Hai organizacións de tempo libre, de estudantes, organizacións relixiosas, organizacións políticas,... entón creo que é unha permanente plural. Isto non é un parlamento, non hai tres partidos políticos no seo do Consello da Xuventude de Galiza. Non creo en absoluto nas críticas que se verteron contra nós.