Lois Rodríguez, editor de Vieiros

O portal máis visitado en lingua galega e o máis importante dos diarios virtuais, vén de cumprir a súa primeira década de existencia. Vieiros naceu o 24 de febreiro de 1996, aniversario do nacemento de Rosalía de Castro e da primeira emisión da Radio Galega, tomando o nome da revista do Padroado da Cultura Galega en México. Por iso, e coa axuda das novas tecnoloxías, mantivemos unha entrevista “on line” co seu editor, Lois Rodríguez.

Antón Fernández / Diego Giráldez

Hai dez anos nacia Vieiros, cóntanos como foron os inicios, como xurdiu a idea
Eu e outras persoas cas que traballaba levábamos tempo enganchados ás BBS, que eran uns repositorios de asoftware que se podía descargar por unha conexión telefónica normal . No ano 1995 tiven por primeira vez unha conta de correo electrónico e descubrín que internet era un gran sistema de comunicación, un teléfono moito máis moderno e potente; pouco despois entramos por primeira vez nunha web. No ano 1995 existía un navegador chamado Netscape e estaba na versión 1 pero a atracción foi fulminante. Chegamos moi axiña á conclusión que aquelo íase converter nun gran medio de comunicación e rexistramos un dominio (creo que o primeiro privado galego) e comezamos a barallar a idea de facer un Yahoo "á galega", esa foi a idea primeira de sacar adiante Vieiros. É dicir se Yahoo catalogaba as webs mundiais, e lembro que había un metáfora moi estendida naquel momento que dicia que internet era unha cidade global (dandolle unha volta á aldea global de MacLuham), nós eramos o barrio galego desa cidade mundial. E así nacimos, como o barrio galego na internet.

Tedes moitisimos colaboradores e correspondentes por  todo o mundo...
Si, desde o principio contamos con moita xente que quería comunicar, publicar as súas ideas, as súas formas de vivir o mundo,  e vían en Vieiros o medio de facerllo chegar a outros galegos aló onde estiveran. Hai que pensar que nós pasamos de ser un catalogador de webs estilo Yahoo a un medio de comunicación, a un xornal, por petición expresa da xente da emigración e creo que por ese mundo sempre tivemos moitos colaboradores, por lles dar o que foron pedindo.

Costou moito darlle entender á sociedade galega que podíamos ter un xornal electrónico?
Uf, moitísmo. Nós pasamos do ano 95 ao 2000 aproximadamente facendo evanxelismo do que internet podía supor para un pais como Galiza. Houbo xente que o entendeu moi ben, e así nos anos 97 e 98 houbo unha certa época dourada da rede no país. Íamos por diante doutras partes do Estado, pero houbo moita outra que non entendía nada, que pensaba que iso era unha coña, que era tirar o diñeiro, etc. Houbo un secretario xeral ao que lle espuxemos, no ano 1998, o que se podía facer no seu departamento gracias a Internet, respondeunos que ate o 2000 non  ía ter diñero, e que quizais daquela internet sería o pasado e xa nos comunicaríamos todos por telepatía. En fin, as veces o noso é un pais de tolos...

Como reaccionaron os outros medios de comunicación á vosa chegada?
Alguns cunha certa expectativa, a ver de que vai iso dun xornal na rede, pero boa parte cun escepticismo e indiferencia. O certo é que case todos os medios tardaron en utilizar internet para comunicar, ata que se deron conta de que había que estar aí e que había que adaptarse a ese novo medio.

Nestes 10 anos vieiros, ademais de informar, servia de foro galego na rede. Que momentos importantes lembras neste aspecto (emigración, prestige...)
Interesante pàra nós foi ir abrindo as edicións locais na emigración. Tamén lembro que fumos quen de poñer en contacto a un neno de USA cun galego por medio dunha botella con carta que apareceu nas costas da Costa da morte. Outro foi as primeiras eleccións das que fixemos seguemento, ou toda a información sobre o prestige, onde tivemos que cambiar varias veces de servidores xa que non dabamos feito a servir páxinas de tantas peticións que tiñamos. Tamén un congreso en liña que fixemos sobre o galego na época das Cantigas, que debeu ser un dos primeiros que se fixo en Europa. Non sei, fumos sempre pioneiros e temos moitos fitos dos que nos acordar.

As cifras son importantes se falamos dunha empresa de comunicación. ¿canta xente entra en vieiros? ¿de que lugares son?
Temos unha medida sostida de vistas de 9000 visitas  ao día: antes o número de xente da emigración chegaba a ser dun 50%, logo foi baixando e agora, residentes fóra de Galicia supón un 20% das visitas ou quizais, algo menos, un 15%. Ás veces é complicado saber exactamente de onde ven a xente.

Sacáchedes un xornal en papel o dia da selección e moita xente preguntaba se era un novo xornal en galego...¿non vos picou o "verme" de facer algo en papel?
Calquera galego que traballe no mundo da comunicación arela ter medios impresos diarios en galego. Nós cremos que o noso futuro pasa por acompañar proxectos informativos en galego que traballen en papel en radio e en TV. Pero creo que ainda non existe ese grupo de comunicación co que poder traballar. Nós imos dando pasiños de intentar poñer en relación xente de todos eses mundos, pero sen nada concreto nin inmediato que ofertar

Que proxectos ten vieros de cara ao futuro inmediato?
Pois darlle unha volta ao propio Vieiros para que sexa un medio mási cómodo para o lector e máis interesante informativamente e celebrar con varias actividades o noso X aniversario. Tamén poñer en marcha utilidades que acompañen ao noso labor informativo, como tendas, correo  de pago, etc. Queremos tamén repetir un par de veces ao ano ese Vieiros en papel que tan ben valoraron os nosos lectores.

Podes adiantarnos algunha desas actividades?
Estamos ainda pechando cousas e non temos nada concretado, pero haberá un programa que comezará a primeiros de marzo e durará todo o ano.