Iria Aboi Ferradás, Secretaria Xeral de Galiza Nova

O pasado 31 de Marzo e 1 de Abril celebrouse na faculdade de Psicoloxía en Santiago de Compostela a X Asemblea Nacional de Galiza Nova onde se escolleu unha nova dirección nacional e un novo secretario xeral. Iria Aboi Ferradás (Marín, 1982) foi a eleita para comandar a organización xuvenil nacionalista. Na asemblea concorreron dúas listas que reflectian dúas sensibilidades dentro de Galiza Nova. A lista apoiada por Isca! e Esquerda Nacionalista, encabezada por Macías López Igrexas, foi a derrotada frente á lista apoiada pola Unión da Mocidade Galega (UMG). O resultado final foi de 177 votos para a lista de Iria frente aos 111 da lista de Macías. A Peneira estivo ali e falou con ambos protagonistas.

Miguel Penas/ Antón F. Escuredo

- Fáganos unha valoración de como foi a Asemblea?
- O noso obxectivo era ter unha Asemblea Nacional moi participativa que se recollera toda a inquetude dos militantes e de como tiñan eles vivido a experiencia de Galiza Nova, así como recoller todo tipo de análise sobre o papel que ten que desempeñar a nosa organización neste novo proceso político, unha vez que se produce tamén un cambio no goberno da Xunta de Galiza e que temos que enfrontar o reto das eleccións municipais. Para nós esta Asemblea Nacional foi un punto de inflexión para tentar abordar este tipo de problemáticas, nunha organización que sempre se caracterizou pola súa concreción nos problemas da mocidade, das análises concretas, das respostas concretas, e en tentar que se verificaran na súa concreción.

- Sobre a participación?
- Moi positiva. Foi unha asemblea moi numerosa e cunha participación de moita militancia nos debates.

- Houbo máis debate que noutras asambleas? Hai quen fala de certa división interna...
- Eu agardo que logo dun proceso de debate tan pormenorizado, tan longo e onde se puido expresasr calquera militante con liberdade sobre os pareceres da organización e sobre como está evolucionando a organización entendendo o debate como un debate constructivo. Eu creo que Galiza Nova empeza unha nova andaina tentando unir a toda a militancia, entendendo que o pluralismo é un feito conxuntural a Galiza Nova e que a posibilidade de ter diferentes interpretacións de como chegar á mocidade pois é lexítimo nunha organización tan rica e tan viva como a nosa.
Desde o momento en que hai unha dirección que tamén é reflexo desa pluralidade pois tamén os organismos de dirección van a tentar facer o mandato da próxima Asemblea Nacional

- Qué obxectivos hai para este período que comeza agora?
- En primeiro lugar normalizar a vida interna da organización, que o feito de facer crítica e autocrítica non sexa un inconveniente á hora da práctica militante e que, nese sentido, iso sirva para mellorar á organización na súa incidencia coa mocidade, na súa incidencia práctica. Entón, nese sentido, este período terá que vir marcado por reaxir organizativamente máis que nunca e sobretodo trasladar a nosa menssaxe de cara a fora para entrar en contacto con moita máis mocidade e que máis mocidade se achegue ao noso proxecto.

- É a primeira secretaria Xeral de Galiza Nova, cómo se sente?
- Cunha responsabilidade bastante grande porque moitas veces o feito de sermos mulleres as persoas que temos determinadas responsabilidades parece que se nos está máis enriba.

- Un dos problemas da xuventude hoxe en día é o traballo. Existe a emigración de xente nova?
- Sí, a día de hoxe existe a emigración xuvenil. Unha das características estructurais que existe a día de hoxe na mocidade é a emigración, tamén a temporalidade e a falta dun emprego digno. A emigración é un feito que a día de hoxe se segue a producir e xa non só para buscar traballo senón tamén a hora de cursar estudos universitarios. A declaración de Boloña vai nese sentido, de propiciar esa traslación de Boloña a nacións colonizadas como a nosa, pois vai a supoñer que moita xente prefira acadar a súa formación noutro país porque ademais aí xa vai poder ter un posto de traballo.

- Qué lle pide ao goberno para que cese esa emigración xuvenil?
- O que parece pertinente é unha interrelación do goberno galego, neste caso da Consellería de Traballo, coas interaccións xuvenís, e neste caso nomeadamente con Galiza Nova, que é a primeira organización do país en actividade e en número de militantes. Neste sentido nós xa temos manifestado propostas moi concretas sobre o emprego e temos presentado un plan de emprego xuvenil. Entre esas medidas están moitas das que defende Galiza Nova e das que defendeu. Con só intentar aplicar esas medidas xa se tentaría dar un paso importante. outra cousa sería modificar unha serie de elementos estructurais que requiren un traballo moi importante e neste caso deberíaa realizar a Consellería de Traballo e o Goberno galego no seu conxunto.

- Hai unha frase que se emprega moito en manifestacións e que tamén escoitouse nesta Asemblea e é a de "Galiza Ceibe Poder Popular". Que significado ten a día de hoxe?
- Significa tentar que o noso país conte co dereito de autodeterminación, que sería que o noso pobo puidera decidir por el mesmo sobre o que quere ser e como quere establecer as súas relacións co resto dos pobos do mundo e co resto do estado español. Neste sentido, a segunda parte, o de Poder Popular, é a concreción deste dereito. Se os galegos e galegas exercen ese dereito de autodeterminación estaríase verdadeiramente levando o poder ao pobo e estaríase exercendo conforme ao pobo quere.

- Sería necesario, entón, un plebiscito?
- Consideramos que a día de hoxe estamos nun proceso de concienciación e liberación nacional, e nese sentido cada cousa ten que ir ao seu tempo. Si que nun futuro, dependendo da concienciación nacional que haxa no país, que sería o máis lóxico.