Borja Neves, secretario da Asociación Cultural Casco Vello-Libredón

“Casco Vello-Libredón” é unha asociación que naceu en Compostela en Xuño do ano pasado. Entre os seus obxectivos principais ten a promoción de actividades culturais e de tempo libre ligadas aos xogos de rol e de
estratexia, aínda que tamén aos relacionados coa literatura histórica, fantástica e de ciencia ficción. Tentan realizar boas e fieis recreacións históricas nas súas actividades sen esquecer a promoción da lingua nas mesmas.

Bástiám Carreira/COMPOSTELA

-Aínda que vos poda parecer mentira hai moita xente que non sabe o que é o rol, ou os xogos de rol. Poderías explicar brevemente de que se trata?
-Os xogos de rol son, en poucas palabras, contos interactivos nos cales hai un director de xogo que chamamos Máster. Este director crea un fío argumental fantástico no que participan personaxes con características definidas que interactuan nese mundo dirixido e creado polo Máster, facendo que ese mundo evolucione e que se vaia construíndo unha historia.

-É importante, por tanto, ter imaxinación, non é?
-Con certeza. A pesar dos tópicos que mostran os xogadores de rol como seres isolados nunha especie de mundo interior, nada máis lonxe da realidade. Aquí todo é imaxinación, o que conta non é gañar senón pasalo ben, crear unha trama divertida e amena. Xa ten pasado que obras da literatura fantástica se teñen baseado en grandes partidas de rol.

-A que se dedica unha asociación de rol?
-Bon, “Casco Vello” é unha asociación de rol e tempo libre, tentamos abranguer un algo mais. O importante desta asociación é pór en contacto xente, combinar para xogar ao rol, tanto en partidas oficiais da asociación como noutras, coñecerse, trocar ideas e experiencias,...

-Desde cando existe a vosa asociación como tal?
-Fai xa algún tempo, desde o verán pasado. Entre as nosas primeiras actividades, organizamos unhas xornadas de dous días na Chocolatería en outono, un pouco para que se coñecese o que era o rol.

-Que mais actividades tendes feito?
-Desde a nosa primeira actividade, que foi algo mais ambiciosa, o que temos organizado sobre todo son xogos de rol, algún deles en vivo. Destes últimos podo destacar un de vampiros que tivo bastante repercusión na cidade. Agora que xa temos local, no C.S. “O Pichel”, supoño que tentaremos avanzar mais e en novos proxectos.

-Falanos algo desas ideas que tendes para o futuro?
-Agora mesmo estamos xa con un ciclo de cinema fantástico todas as quintas ás 21:30. Non é un ciclo dunha temática concreta, senón filmes que nos teñan inspirado e marcado como xogadores de rol. Desde Conan a Blade Runner,... filmes de directores e produtores que eu acho nun 90 % teñen xogado ao rol algunha vez.
Aínda que non é unha iniciativa da asociación mais si de dous dos socios fundadores, podo anunciarche que en breve vai saír o primeiro xogo de rol galego, e en galego, ambientado nunha Galiza céltica e mítica, que levará por título “As Crónicas de Gáidil”

-Coñecedes outras asociacións similares noutros puntos do país? Tendes relación con elas?
-Sei que existe unha en Pontevedra coa que nós temos relación e contacto. E que eu saiba existe tamén outra en Ferrol. Temos na cabeza o proxecto de facer unha federación a nivel nacional, mas aínda está todo moito no ar.

-Que nos podes contar dos apoios institucionais a este tipo de iniciativas? Como está o tema?
-En principio non nos apoia ninguén. O rol tivo moi mala publicidade nos 90. Aínda así, e sobre todo a partir da partida de vampiros na que participaron mais de 500 persoas, xa se ten algo de apoio das institucións. Para as actividades da Chocolatería tivemos unha ajuda económica da Concellaria de Cultura. A nível galego a Dirección Xeral de Xuventude ten apoiado a organización dunha partida de rol en vivo, a dos irmandiños, que foi todo un éxito. Supoñemos que unha vez superadas as primeiras desconfianzas a colaboración irá a mais. Sobre todo para proxectos que teñan a ver con recreación histórica, algo que está moi de moda e que se fai moito nos países do Norte de Europa.