Nestas tres últimas décadas, o Día da Patria ten sido un termómetro para medir a dimensión da vontade social de construír un autogoberno nacional capaz de respostar ás demandas e necesidades da maioría das mulleres e homes do noso Pais. Cada 25 de Xullo tivemos ocasión de comprobar os avances rexistrados e puidemos constatar o camiño que ficaba pendente.

O Día da Patria deste ano 2007 coincide co momento histórico no que o nacionalismo político dispón da maior presenza institucional rexistrada dende o comezo da andaina democrática. Ao mesmo tempo, a carencia dun novo Estatuto de nación ilustra sobre a necesidade de acadar un medre significativo no apoio social a un proxecto de autogoberno digno de tal nome.

O cambio operado na Xunta de Galiza debería posibilitar unha nova consideración desta data na vida institucional galega. O Parlamento, como máxima expresión da soberanía popular, sería o lugar mais adecuado para facer do 25 de Xullo un ponto de encontro cívico de todas as entidades representativas da sociedade galega.

* Profesor da Faculdade de Económicas da USC.Deputado polo BNG no Parlamento de Galiza dende 1993 ate o ano 2005, exercendo a función de portavoz de Economía do Grupo Parlamentar. Membro do Consello Nacional do BNG.