O Tribunal Supremo obriga á ACB a readmitir na súa competición ao Obradoiro, conxunto galego que na eliminatoria de ascenso da tempada 1989-1990 reclamou unha aliñación indebida de Esteban Pérez (por falsificación de documentos para xogar como español), xogador do Júver Murcia. "Estamos moi satisfeitos, porque despois de dezasete anos a xustiza deunos a razón", sinalou o presidente de conxunto compostelán, José Ángel Docobo (que non descartou unha hipotética fusión entre o Obradorio e o Beirasar Rosalía, equipo compostelán que na actualidade milita na Adecco LEB Ouro, para afrontar o sono da ACB).

A gala dos Premios Nacionais do Deporte Galego premiou ás figuras máis destacadas do 2007. Celebrouse no Teatro Rosalía, na Coruña. O gran protagonista foi o triatleta Javier Gómez Noya, que recibiu o galardón ao mellor deportista do ano. O acto será presentado pola xornalista Lis Franco. O ferrolán Gómez Noya viu recoñecida a súa brillante traxectoria nesta tempada. Gañou a Copa do Mundo por segundo ano consecutivo, proclamouse campión de Europa e foi segundo no Mundial.

Disputouse en Pamplona o V Campionato de España Sub17 de halterofilia, no que a Selección Galega rematou en segunda posición na modalidade feminina, e en terceira na masculina. Tamén un excelente papel xogou o combinado galego de squash, que se fixo co subcampionato na cidade de Málaga.