Redacción

Nun país como o noso, cunha fonda tradición de crenza nos fenómenos máxicos, non podía faltar un evento dedicado a festexar o fascinante mundo do prestixio. Para acadar este recoñecemento necesario puxeron mans á obra os profesionais reunidos baixo as siglas da Asociación de Magos Profesionais de Galiza (MPG).
Difusión e protección
A MPG naceu co espírito de defender e impulsar a actividade da maxia profesional en Galiza. Xurdiu como unha iniciativa dos profesionais para tentar crear un espazo propio dentro das actividades artísticas e culturais do país. A súa finalidade fundamental é a de situar a actividade artística da maxia na consideración da sociedade galega como unha arte con entidade propia.
No seu amplo grupo de actividades destacan o interese por colaborar coas Administracións Públicas na difusión da maxia, o uso da língua galega como vehículo de difusión dos seus espectáculos e o interese por difundir o gusto pola maxia a novas xeneracións de magos.
Mais, sen dúbida, un dos proxectos máis ambiciosos da Asociación de Magos Profesionais é o de sentar os piares para a creación dunha futura Escola de Maxia de Galiza tentando acadar un recoñecemento legal das ensinanzas que podan impartir no futuro.

Ilusión nas rúas
E foi así, a través do interese da MPG, como o Concello de Santiago en xeral e a Concellaría de Cultura en particular se interesaron pola celebración desta Semana Internacional do Ilusionismo.
O programa de actividades deseñado polo Concello alongouse durante a semana que foi do 15 ao 22 de Abril. O conxunto de espectáculos deseñado ascendeu a un total que superaba os 60, a maioría deles de acceso libre.
Deste xeito, rúas, prazas e espazos públicos en xeral convertíronse en inesperados escenarios para acoller representacións de ilusionismo, maxia e presitidixitación. Máis de 30 magos procedents de todo o mundo colaboraron para transformar Compostela nun referente da maxia e a ilusión.
A iniciativa de "Compostela Maxia" partiu, como xa se dixo, do colectivo d eMagos Profesionais de Galiza. Así, esta Iª Semana Internacional do Ilusionismo se integra nun proxecto máis amplo e ambicioso, denominado Mil Primaveras Por Arte de Maxia.
Unha finalidade fundamental: lograr estabelecer un circuito anualde catro grandes festivais internacionais en todo o país, que convirtan a Galiza en referente mundial do sector.
Neste caso concreto, a organización do festival correu a cargo da Concellaría de Cultura compostelana e foi patrocinado pola Dirección Xeral de Creación Cultural da Consellaría de Cultura e pola S.A. de Xestión do Xacobeo coa colaboración do Consorcio.

Un programa completo
Na que, sen dúbida, foi unha programación completa e ambiciosa, o pistoletazo de saída correu a cargo dun dos profesionais máis valorados a nivel europeo: o portugués Luis de Matos.
Matos, que realizou o seu espectáculo nunha atestada Praza do Obradoiro, xogouse a vida nun espectáculo de escapismo que emulou ao realizado nas primeiras décadas do século pasado polo gran Harry Houdini.
Así, o ilusionista luso logrou zafarse dunha camisa de forza pendurado a 30 metros de altura dun guindastre mentres o tempo corría da súa contra, xa que lle prenderon lume á corda que o sostiña unha vez izado…
A intensidade deste acto inaugural xa presaxiaba a calidade dunha celebración que contou, ao tempo, com ducias de espectáculos de rúa que ocuparon, incluso, o insólito (para estes menesteres) espazo da Praza de Abastos santiaguesa.
Xunto a Luis de Matos e un montón de magos e ilusionistas galegos encabezados polo excepcional mago Romarís de Negreira, participaron en Compostela Máxica outras grandes figuras da maxia mundial como o xaponés Mahka Tendo, o estadounidense Aaron Crown, o sueco Johnny Lonn e os tamén estadounidenses Armando Lucero e Kevin James (un dos mestres de David Copperfield).

Gala Internacional
Con máis de 10 actuacións cada día, as noites foron reservadas para os grandes escenarios composteláns. Tanto o Teatro Principal como o Auditorio de Galicia foron os únicos nos que se cobrou entrada por acceder.
O Principal colleu dúas galas, nas que interivon, entre outros, Kiko Pastur e Abe Rábade, Chrystyan Magic, Dylan Ace, Malo, el Malísimo, Vituco, Romarís, Cyrille Sinclair e Pedro Volta.
Mais a gran gala, a Gala Internacional Compostela Máxica , celebrouse no Auditorio de Galicia coa intervención de Aaron Crown, Armando Lucero, Jason Ace, Johnny Lonn, Kevin James e Mahka Tendo, con Pepe Regueira de presentador.
Foi este un broche de ouro para festexar o éxito dun conxunto de espectáculos que teñen intención de perdurar nas seguintes primaveras.

Satisfacción dos profesionais
Non se agardaba, desde a organización da cita, un éxito como o obtido. Desde a Asociación de Magos Profesionais de Galiza, o Mago Antón destacaba que, "a pesares de ser unha arte escénica en contínuo crecemento, é certo que, en xeral, é moi descoñecida para o gran público se nos vamos fóra dos 3 ou 4 nomes de éxito mediático".
Sen embargo, Antón destacou que o grande obxectivo das xornadas era o de "gozar deste gran espectáculo que tentou facer que os máis grandes se convertiran en nenos por unhas horas", e que ese obxectivo cumpriuse com creces.
Desde a Concellaría de Cultura, por outra banda, as palabras de valoración se achegan bastante ás que presentan os magos do país. A "Iª Semana Internacional de Ilusionismo de Galiza" convertiuse nun éxito de público que, sen dúbida, "será repetido en anos posteriores".
O concelleiro de Cultura de Compostela, Néstor Rego, destacou que "a Semana da Maxia se eu a sumar a outra serie de iniciativas que xa existían e que tentan incidir no proceso de achegar a actividade cultural á cidadanía e en faer de Compostela un referente cultural europeo e mundial".
A este respecto, Rego sinalou que esta actividade se une a outras iniciativas postas en marcha nos últimos tres anos como Sons da Diversidade, Festival d'Gorra, Festiclown… e a outras que xa existían como Cineuropa ou En Pé de Pedra.