redacción

A edición galega da nova novela de Paul Auster, 'Un home na escuridade', chega ás librerías da man da Editorial Galaxia. A novela lanzarase tamén nesta mesma data en inglés e castelán. O autor estadounidense ten xa publicados en galego 'Broolyn Follies', 'Viaxes no scriptorium' e 'A vida interior de Martin Frost', a través da mesma editorial.

Na súa nova novela, Paul Auster enfróntase ás pantasmas da sociedade contemporánea cunha trama que conxuga a historia de August Brill, un crítico literario retirado que padece insomnio, coa duns Estados Unidos sumidos nunha nova guerra civil logo da secesión dalgúns estados por causa dos resultados electorais do ano 2000. Nun xogo fascinante despréganse dúas novelas. Nunha delas, o protagonista é Owen Brick e o escenario uns fantasmais EUA, sen guerra de Irak nin Bush, sumidos nunha contenda civil. Auster sitúa o lector ante unha retorta e reveladora versión da política americana actual e dos seus dilemas éticos.

A outra é a novela familiar do narrador, na que August Brill nos conta e se conta a súa propia vida e descobre dilemas, amores, segredos e traizóns. Nado en Nova Jersey en 1947, o escritor norteamericano recibiu en 2006 o Premio Príncipe de Asturias das Letras. A súa obra atinxe o ensaio e a narrativa, tamén guións de cine e algúns títulos de poesía, sobre todo na súa primeira época. En 1987 entrou nos circuitos da literatura internacional como autor altamente recoñecido a partir da súa obra 'The New York Trilogy'.