Redacción

Neste caso á segunda foi á vencida. Logo dunha primeira negativa do pleno, a corporación municipal de Gondomar volveu a levar na orde do día o convenio co Consorcio Galego de Servizos de Igualdade e Benestar que posibilitará que o concello poña en marcha a gardería municipal no primeiro trimestre de 2008, neste caso convertida en Galescola.

Serán 74 os nenos do concello - cunha demanda de entre 200 e 300 nenos - os beneficiarios desta nova infraestructura municipal que funcionará de 7.30 a 21.30h. A Xunta farase cargo, logo da súa aprobación no pleno, de 56.000 euros para o equipamento desta infraestrutura municipal
Esta aprobación chega logo de que o PSOE cambiara o seu voto e votase a favor, como tamén o fixeron o BNG e MOVE.

O PP continuou coa postura de abstenerse, aclarando o seu voceiro, Carlos Silva que "é unha obviedade que non estamos en contra de que este servizo entre en funciomamento coa máxima urxencia, xa que é unha das reclamacións históricas dos veciños de Gondomar. Somos conscientes de iso". Non obstante, "tiven a preocupación de averiguar cómo funcionan outras garderías municipais, e estou convencido de que, firmando este convenio, somos moi xenerosos coa Xunta de Galicia ao cederlle un edificio municipal por un periodo de dez anos".

A concelleira de Benestar Social, María Luisa Varela, recalcou a importancia de que a gardería comece a funcionar no primeiro trimestre do 2008, e lembrou a imposibilidade das arcas municipais de facer fronte ao que custaría a xestión e posta en marcha deste servizo público, que beneficiará a moitas familias de Gondomar.