::: A PENEIRA DIXITAL :::

cidades

Máis de tres mil persoas na manifestación para solicitar o indulto para os tres de O Eixo

Máis de 3.000 de persoas -10.000 segundo a organización, 400 segundo a Policía Local- manifestáronse en Santiago para pedir o indulto para os tres veciños da parroquia compostelá de O Eixo que ingresaron o pasado 30 de outubro en prisión por un delito de agresión a un axente policial fai nove anos durante unha acto convocado para reclamar maior seguridade vial.

O Iberojazz 2008 repasará os 60 anos da historia do jazz na península

A concelleira de Cultura da Coruña María Xosé Bravo, o asesor artístico de Iberojazz Alberto Conde e o compositor e guitarrista coruñés Pepe Evangelista, presentaron a terceira edición do festival Iberojazz, que se celebra na Coruña o próximo mes de xaneiro.

Eisenman asume a "responsabilidade artística" pero afirma que os cambios de tamaño da Cidade da Cultura foron decisión da Xunta

Peter Eisenmanm, o arquitecto que dirixe as obras da Cidade da Cultura, asegurou no Parlamento que os cambios de tamaño e orzamento do proxecto foron decisión da anterior Xunta de Galiza. "Eu asumo a responsabilidade artística e son a capitán do barco, pero non marco o prezo dos billetes", manifestou.

Táboas presentou o proxecto gañador para a rehabilitación do Pazo de Dona Urraca en Lugo

A Conselleira de Vivenda e Solo, a nacionalista TeresaTáboas, presentou en Lugo o proxecto gañador do Concurso de ideas para a rehabilitación integral do Pazo de Dona Urraca e o seu entorno cuxa autoría corresponde ás arquitectas Belinda Besada e María Esther Faílde.

Breves

Constitución do Consello Municipal de Medio Ambiente

A primeira reunión do Consello de Medio Ambiente celebrouse no Auditorio de Galicia, e foi presidida pola nacionalista Elvira Cienfuegos, concelleira de Medio Ambiente e Desenvolvemento Sustentábel en Compostela. Á xuntanza asistiron representantes de diferentes sectores cidadáns e como primeira medida aprobouse un plano de traballo para os próximos meses que terá como obxectivo fundamental o desenvolvemento da Axenda 21 Local.

A USC amplía a súa cobertura wifi con "Campus en Red"

Máis de 28.292 universitarios, perto de 2.250 profesores e 1.200 empregados que compoñen o persoal de administración da Universidade de Compostela terán acceso a Internet desde calquera punto do campus coa cobertura wifi desenvolvida por "Campus en Red". Este programa, é unha iniciativa de Red.es, entidade do Ministerio de Industria, Turismo e Comercio, e conta coa participación do Ministerio de Educación e Ciencia, a Xunta, a Conferencia de Rectores de Universidades Españolas e a Universidade de Santiago de Compostela.

Un Nadal en galego

"Carta aos Reis Magos" e "Para vivir un Nadal en galego" son as dúas novas campañas que vén de por en marcha a Concellaría de Normalización Lingüística do Concello de Compostela. O seu obxectivo, promover o emprego do galego entre os nenos e entre os comerciantes, respectivamente.