A Peneira recibe o Premio da Crítica de Galicia no apartado de Iniciativas Culturais

Vintedous anos atrás, cando A PENEIRA botou a andar, ninguén podía presaxiar que un día o seu labor en defensa do galego sería recoñecido cun galardón da relevancia dos Premios da Crítica de Galicia. O pasado día 27, na vila termal de Mondariz Balneario, o xornal recolleu esta distinción en compañía dos demais galardoados.

Redacción/MONDARIZ-BALNEARIO
Entre os premiados que acompañaron ao xornal A PENEIRA na recepción do galardón estaban a escritora Teresa Moure, que actuou de voceira de todos os premiados, o tamén escritor Xavier Alcalá, o investigador Xosé Ramón Freixeiro Mato, o técnico de son Pabro Barreiro Rivas, o proxecto de danza En pé de pedra, e mailo Galego egrexio deste ano, título que recaeu na persoa do político Xosé Manuel Beiras Torrado.

   O momento máis emocionante foi, como todos os anos, a
   entrega da distinción do galardón de Galego egrexio.

A solemne entrega de premios contou, ademais, coa presencia de numerosos invitados de excepción, que quixeron agasallar coa súa presenza aos galardoados. Unha nutrida e diversa representación dos distintos eidos da sociedade galega, dende o da política, coa presenza ca conselleira de Cultura, Ánxela Bugallo, a de Pesca, Carmen Gallego, ou a secretaria xeral de Política Longüística, Marisol López, ata o da cultura, co fotógrafo Xurxo Lobato ou o editor Víctor Freixanes, así como xente do mundo da empresa, o deporte, o cine, e un longuísimo etcétera que sería excesivamente pesado detallar.
O momento máis emocionante foi, como todos os anos, a entrega da distinción do galardón de Galego egrexio. O tamén político e politólogo Xosé Manuel Barreiro realizou unha semblanza do premiado na que resaltou diversos aspectos da súa dilatada traxectoria política e da súa personalidade, semblanza que foi agradecida con posterioridade polo propio Beiras, nun discurso improvisado no que lembrou os seus anos de mozo e a influencia que a familia tivo no seu desenvolvemento persoal e políticico, para logo facer unha breve semblanza da Galiza que imaxina e desexa.
Logo da entrega dos galardóns, consistentes nunha figura de Sargadelos, tivo lugar a tradicional cea.

enpoucaspalabras