 Fragmento dunha portada Ademais, Xerais ten vendido máis de dez millóns de exemplares. Segundo os datos do ISBN, a editorial sitúase ininterrompidamente nos últimos vinte anos á cabeza da produción editorial en lingua galega, por número de títulos; e dentro das cincuenta primeiras empresas editoriais de España. Dende o seu nacemento, a función principal de Xerais foi non deixar baldeiro campo ningún da comunicación impresa necesaria para Galicia. Editorial tamén de vontade educativa, dende 1980 está especializada na edición de libros de texto en lingua galega, que constitúen o 22 por cento dos títulos do seu catálogo. Un catálogo vivo Na actualidade, ten unha completa oferta de materiais didácticos para o ensino da lingua galega no ensino non universitario, que abrangue todos os cursos da Educación Infantil, Primaria e Secundaria. Tamén publica libros de texto en lingua galega para as diferentes materias de Xeografía e Historia, Ciencias da Natureza, Educación para a Cidadanía, Filosofía, Matemáticas e Música do Ensino Secundario. No ámbito da edición xeral, a editorial posúe un extenso catálogo literario, o 23 por cento do seu catálogo, e que aborda todos os xéneros: narrativa, poesía, teatro, xornalismo, clásicos da literatura galega.... Tamén conta con publicacións lexicográficas, como dicionarios; e universitarias e de ocio, como guías de viaxe ou de natureza. Os libros infantís e xuvenís forman outro 22 por cento do seu catálogo. Xerais edita, fundamentalmente, en soporte papel, aínda que dende 1997 iniciou a edición de CD-ROM, DVD e discos compactos, baixo o selo Xerais Media. Por se fora pouco, convoca anualmente, dende 1984, os seus galardóns literarios: o Premio Fundación Caixa Galicia de literatura Xuvenil, o Premio Xerais de Novela e o Premio Merlín de literatura Infantil.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario