 Guillerme Vázquez comparecendo ante a prensa Vázquez, que criticou o "escurantismo" que aínda envolve as cifras no que definiu como "método Salgado", considera que os 620 millóns que se barallan para Galicia "non manteñen en absoluto a posición relativa de Galicia". O nacionalista advertiu que a falta de claridade nos datos dificulta saber cal é exactamente a situación, pero que "sobre as hipóteses que lle manexan", os cálculos do Bloque colocan á nosa comunidade como receptora do 5 '4% dos fondos adicionais a repartir nos vindeiros tres anos. En relación ao montante total da financiamento autonómica--fondos adicionais máis fondos base-- "non pasamos do 6'5% aínda que nos maten" asegurou o líder do BNG. "Isto está moi por debaixo de manter as posicións relativas" insistiu Vázquez, que lembrou que as esixencias da formación frentista pasan por recuperar e manter o peso do 7 '8% que Galicia tiña no 1999, así como garantir a continuidade da porcentaxe nos anos seguintes. Así as cousas, os nacionalistas galegos votarán en contra do novo modelo de financiamento autonómico, que Guillerme Vázquez cualificou de "continuista" e "inxusto" para Galicia. "É necesario cambiar un modelo que nunca respondeu ás nosas necesidades, que nin foi solidario nin nos levou á converxencia real. Hai que dicilo porque estamos continuamente a comulgar con rodas de muíño" valorou o voceiro nacional do BNG. Vázquez tamén sinalou que os 11.000 millóns de euros en fondos adicionais que o Estado puxo sobre a mesa "son insuficientes", e lembrou que o BNG reclamaba pasar dos 9.000 millóns iniciais a un "mínimo" de 15.000. "Co aumento observan dicir que era certo o que nós diciamos, facían falta máis cartos" considerou. Pasar dos 447 millóns de euros que se barallaban para Galicia no reparto aos 620 que indicaba o secretario xeral do PSdeG, Manuel Vázquez--cifra non confirmada pola Xunta-- tampouco satisfai ao nacionalista. "Haberá máis cartos, se, o problema é en relación a 'que' e a 'quen' " indicou´, antes de apuntar que desde o BNG consideran que o modelo e reparto exposto non vai a permitir "converxer" nin igualar os servizos nas distintas comunidades senón que "se van perpetuar as diferenzas entre as comunidade autónomas máis desenvolvidas e as menos". Sobre a posibilidade de que o goberno galego non firme finalmente un acordo co executivo central--o que a priori podería supor renunciar aos fondos adicionais--, Vázquez limitouse a sinalar que "esa é unha decisión que lle corresponderá ao señor presidente da Xunta", aínda que apuntou que traballar coa ameaza ""de "ou tragas e colles o que che dan ou quedas sen nada" expresa "con toda claridade" con que actitude afronta o Estado a mellora do sistema de financiamento autonómico. Aínda que non confirmou se apoiaría unha hipotética negativa á sinatura do goberno galego, o nacionalista indicou que ir á negociación dicindo "vou asinar o que me boten" sería "peor" e "garantía de fracaso". O voceiro nacional do BNG tamén reiterou que a falta de "ofensiva" e de propostas do goberno galego na negociación do novo reparto colocou a Galicia en disposición para saír "malparada" e que a falta dun novo Estatuto foi clave nesta situación, debilitando a posición da comunidade autónoma. "Nesta altura xa estamos convencidos de que politicamente Galicia xa está en segunda división, sen Estatuto novo, logo de estar en primeira división coa categoría de nacionalidade histórica que nos outorgou a Constitución" comentou.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario