 Feijóo e Vázquez durante un encontro recente Fixo estas declaracións no transcurso da XI Festa Nacional do Baixo Miño, acto que se celebra nas vésperas do Día da Patria Galega e no que o voceiro dos nacionalistas galegos estivo acompañado pola alcaldesa de Tomiño, Sandra González. Vázquez reprochou a Feijóo a súa "inacción" durante o mes que transcorreu entre o 8 de xuño, data na que se acada un acordo xenérico entre as forzas políticas con representación no Parlamento galego, e o 8 de xullo, data na que comeza a verse con líderes destas forzas. "Que estivo a facer durante ese mes?", se preguntou o dirixente nacionalista, quen considera que "mentres outros facían propostas para avanzar, todo o máis que fixo o presidente da Xunta foi dicir virxenciña, virxenciña que me quede como estou". Tras botar man da ironía, sinalou que cando un sae ao campo de fútbol a empatar, "o máis normal do mundo é que acabe perdendo o partido". O dirixente nacionalista asegura que nesta altura Galicia segue sen saber que cantidade dos recursos adicional demanda o presidente da Xunta. "Está de acordo cos 1.300 millóns de euros dos que fala a conselleira de Facenda como necesidades de gasto que ten a Administración autonómica para prestar correctamente as súas competencias?", se preguntou Vázquez, quen reiterou a demanda do BNG, de que a comunidade obteña o 7,8% dos recursos totais do novo sistema de financiamento. "Non demandamos ningunha cantidade astronómica. O 7,8% era o que tiña Galiza hai unha década", alega Vázquez, quen sinala que "menos diso é inasumible". Reclama, ademais, "garantías de blindaxe" para evitar o que ocorreu nos últimos dez anos, onde Galicia pasou do 7,8% no 1999 ao 7,1% no último exercicio.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario