|
O director xeral de Ordenación Xeral de Recursos Mariños, Pablo Fernández Asensio, asinou un total de 13 convenios con 7 confrarías da Ría de Vigo e mediante os que a Xunta achegará un total de 311.400 euros, co obxectivo de lograr unha mellora na xestión, conservación, protección e sostibilidade da explotación dos recursos mariños.
Os acordos pecháronse cos pósitos da Guarda, Arcade, Baiona, Cangas, Moaña, Redondela e Vigo e estarán vixentes ata o vindeiro 31 de decembro, aínda que queda aberta a posibilidade de prorrogalos. A Consellaría do Mar, que achega os citados 311.400 euros, comprométese a destinar os medios persoais e materiais propios e necesarios para o desenvolvemento dos obxectivos e, ademais, realizará un seguimento das accións e tomará as medidas precisas para o seu correcto desenvolvemento. Segundo explicou o departamento autonómico que dirixe Rosa Quintana, rubricáronse dous tipos de acordos. Os do primeiro tipo inclúen actividades de salvagarda do medio mariño e as súas especies, establecendo condicións de acceso ás zonas de pesca, con vistas a combater os efectos negativos da sobreexplotación de recursos. Así, incidirase no coidado, control e seguimento de bancos marisqueiros e na loita contra a extracción ilegal. A outra modalidade de convenio asinado está orientada a mellorar a xestión de zonas de produción, incluíndo accións dirixidas a implantar técnicas de semicultivo, elaborar plans de explotación, realizar proxectos de rexeneración de zonas de produción e facer seguimento da produción efectiva dos bancos naturais marisqueiros. Mar xa asinou convenios deste tipo, o pasado 29 de xaneiro, coas confrarías de Burela, Cariño, Celeiro, Espasante, O Barqueiro, O Vicedo e Ribadeo. Ademais, está prevista a rúbrica doutros 12 coas confrarías da Coruña, Barallobre, Ferrol, Miño, Mugardos e Pontedeume.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario