 Méndez Ferrín Xosé Luis Méndez Ferrín informou que un dos obxectivos da nova directiva da Real Academia Galega é estar nos orzamentos da Xunta de Galicia e do Goberno central, xa que a RAG como organismo independente non se encontraba entre eles. A institución tampouco dispón de fondos propios, senón que sobrevive grazas ás axudas voluntarias proporcionadas polas deputacións que teñen un "compromiso histórico con ela", como é o caso do concello da Coruña, ou dos que ofrecen o seu apoio ocasionalmente. O novo presidente da RAG reunirase co presidente da Xunta, Alberto Núñez Feijóo, e o resto de partidos políticos para chegar a un acordo parlamentario sobre a situación económica da Real Academia. "Os poderes políticos teñen a obriga de escoitar a RAG como espazo público e de carácter oficial", dixo Méndez Ferrín. O recente elixido voceiro da institución sinalou que para chegar a "unhas condicións mínimas" coas que se poida pagar aos traballadores e cubrir outros gastos da entidade, necesítanse 1.200.000 euros. "A asociativa e os académicos traballan en réxime de voluntariado, aquí non hai soldos", informou Ferrín, pero "iso si, están moi satisfeitos con que así sexa, non reclaman nada". Á parte das achegas voluntarias ofrecidas polas entidades políticas provinciais e de organizacións privadas, a Real Academia vive das subvencións puntuais pola elaboración de dicionarios, traballos de sociolinguística ou gramáticas da lingua galega. Decreto e Premio Nóbel Xosé Luis Méndez Ferrín opinou, durante a entrevista a RNE, sobre a declaración feita por Núñez Feijóo de que os participantes na manifestación contra o decretazo eran "nacionalistas con comportamento radical", ao que o dirixente da RAG respondeu que "ao meu entender, querer conservar un decreto inalterado pola normalización lingüística é ser conservador", e engadiu que "ser radical é querer desfacer todo o que se fixo todos estes anos polo galego". Ao preguntarlle sobre a súa candidatura para optar, de novo, ao premio Nobel dixo que era "unha satisfación" porque Galicia "é digna de ter un premio Nobel de literatura" fose el o candidato ou outro profesional galego. "É un acto de autoestima importante nun lugar onde existe moito complexo de inferioridade" ao encontrase con persoas que "minusvalían" a súa propia cultura e historia.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario