 Os Baltar, pai e fillo A victoria de Baltar Blanco orixinou chamadas desde diversas posicións á unidade do PP ourensán, tras o final dun partido que agora debe dar paso ao traballo para lograr éxitos electorais. Precisamente estes son os deberes que o líder do PPdeG, Alberto Núñez Feijóo, deixou aos populares ourensáns, e é que pide que revaliden "os mesmos éxitos electorias que deu Xosé Luis Baltar durante 18 anos". Para afrontar este difícil reto, José Manuel Baltar defendeu ante os compromisarios e visitantes os seus apoios, lanzando advertencias a PSdeG e BNG, porque "este partido vai ir a por todas nas municipais" e en convocatorias electorais vindeiras. E se Ourense foi un dos eixes da súa campaña, anunciou que os populares da provincia promoverán un proxecto para acadar que esta urbe sexa "capital europea da cultura" no ano 2020. O gañador apelou tamén á igualdade, que non "reequilibrio territorial", entre todos os territorios da provincia, e afirmou que esta será a súa "aspiración" e non "papel mollado". E para todo, propón unha executiva renovada ao 66% que, liderada por el, camiñará cara a "un ben común" que é o "futuro de Ourense". "Síntome modestamente preparado, con forza, contundencia e discurso" para asumir o reto, aseveró o novo presidente provincial. Comprometeuse, así mesmo, a "loitar por Ourense e todos os seus concellos", co orgullo de levar "o apelido Baltar". E tamén, cun novo "PP de Ourense que combina a experiencia coa política do século XXI de vangarda". Unha constante nos discursos da xornada foi esa chamada á unidade do partido tras a tensión da disputa da Presidencia. E aínda que non fixo unha mención expresa á candidatura perdedora, Baltar Blanco afirmou a todos os militantes que "estou con vós", "podedes contar comigo" e asegurou que "unidos" poderán lograr "grandes retos". Ademais de agradecementos como profesor político, Baltar Blanco fixo unha chiscadela ao seu pai, Baltar Pumar, para dicir que este estivera á fronte da Deputación de Ourense "ata cando queira". O líder do PPdeG, Alberto Núñez Feijóo, defendeu ao peche do congreso, a "democracia interna" que dominou este conclave e neste sentido augurou éxitos nos próximos comicios. "Despois de congresos democráticos veñen as vitorias democráticas", enfatizou, para asegurar que isto foi o que ocorreu en Galicia cando el mesmo situouse como sucesor de Manuel Fraga, en Valencia ou nas eleccións europeas. Con estas referencias, Feijóo presaxiou que "ocorrerá en Ourense, volvendo a gañar a maioría dos concellos e recuperando a cidade". Os deberes para os populares ourensáns van máis alá, e é que o seu líder galego pediulles tamén que adquiran un papel protagonista para contribuír á victoria ""dos populares nas Eleccións Xerais de 2012, pois quere que PSOE e BNG sexan pais dos fracasos nos comicios para que "as derrotas" non sexan "orfas". Pola súa banda, o secretario xeral do PPdeG, Alfonso Rueda, lembrou á executiva gañadora que "os inimigos políticos non están aquí dentro, están aí fóra". Convidou, así, a evitar que exista "un partido dividido", o que o fai "feble", para que a oposición non poida utilizar esta "estratexia" contra os populares. "Creo que teremos intelixencia suficiente para saber que 62 máis 38 suman 100, e que non 100% estamos todos", sinalou, apelando á conformación dun partido "unido". Tamén falou Feijóo dese 100%, lembrando o actual presidente que "o 100% dos afiliados están pendentes de vós". Expresou, igualmente, o seu convencemento de que Jiménez Morán porase a disposición de José Manuel Baltar, unha vez que acabou "o derbi ourensán". Tras o partido, advertiu o novo presidente do PP ourensán, chega o traballo e o acudir á sede do partido para "sentir a soidade, a responsabilidade de ser presidente de todos" e de acontecer ao "antecesor ". Chámao, iso si, a "saír a pé de rúa" para non esquecer que o que preocupa aos cidadáns é o desemprego, o benestar e a cultura.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario