 Rafael Moral Escudero, presidente da Asociación Colegas Segundo afirmou Rafael Moral, se a media interanual galega de contaxios de VIH está en torno aos 76 casos por millón de habitantes, Pontevedra acada os 92, o que significa "que a nosa provincia cuantifica ao ano case 20 casos máis que o resto da comunidade", e avanzou que o informe da Xunta tamén sinala que o colectivo homosexual está sufrindo un proceso de incremento no que atinxe ao risco de infección por VIH, pasando do 19% dos casos no 2004 ata o 44%. Por iso, a Asociación Colegas porá en marcha unha ambiciosa campaña de concienciación contra a SIDA en toda Galicia, que terá como obxectivo primordial "achegar ós mozos e mozas a realidade do SIDA", para o que se porán en marcha parolas en centros educativos, fomentarase a educación sexual e facilitarase información de cara á adquisición dunha responsabilidade social nesta materia. A campaña, que se realizará co eslogan "Ponlle corazón", "chegará á xente en forma de 5.000 corazóns antiestrés de escuma e centos de carteis nos que se perfila un corazón feito de palabras, ideas e conceptos que reflexan os temas que, a cotío, xiran a redor da SIDA", segundo indicou Rafael Moral. Pola súa banda, a vicepresidenta da Deputación, Teresa Pedrosa, que anunciou o apoio da institución provincial a esta campaña, afirmou que "as armas claves para evitar esta enfermidade que afecta a millóns de persoas no mundo son a sensibilización e a prevención", e neste sentido comprometeuse a colaborar coas asociacións que realizan tantas actividades de prevención e sensibilización como de apoio e formación aos colectivos afectados.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario