 Rafael Louzán Durante a súa intervención xa como presidente electo, Rafael Louzán, que obtivo 807 votos válidos dos 825 emitidos, afirmou que a súa nova executiva "combina experiencia e zume novo para asemellarse no posible á sociedade que representa", e coa que traballará para recuperar nas próximas eleccións municipais o maior número de alcaldías posibles, especialmente as de Vigo e Pontevedra, e manter así o control da Deputación provincial. Na nova executiva do PPdeG pontevedrés continuarán os colaboradores máis estreitos de Rafael Louzán como o concelleiro de Vigo, José Manuel Figueroa ou o vicepresidente da Deputación, José Juan Durán, que seguirán ostentando os cargos de vicepresidente, e secretario de organización, respectivamente, e o alcalde de Lalín, José Crespo, que será vicesecretario xeral. A principal novidade da nova cúpula dos populares pontevedreses é a presenza como secretaria xeral, é dicir, "o número tres" do partido, de Begoña Estévez Bernárdez, avogada e funcionaria da Deputación, que ocupará o cargo de secretaria xeral, aínda que non é a única incorporación feminina a esta executiva, xa que se suman tamén a directora xeral de Comercio, Nava Castro e a delegada territorial da Xunta en Vigo, Lucía Molares. Ademais, os conselleiros de Medio Ambiente, Agustín Hernández, e de Economía, Javier Guerra, a presidenta do Parlamento, Pilar Rojo, o delegado territorial da Xunta en Pontevedra, José Manuel Cores Tourís, ou a deputada no Congreso, Ana Pastor, que será a coordinadora xeral de Política Nacional, forman parte desta nova executiva do PPdeG de Pontevedra. Rafael Louzán, que encabezaba a única candidatura que se presentou neste XV congreso provincial mostrouse "confiado" no futuro do PPdeG pontevedrés, do que destacou que "soubo ampliar a súa base electoral" coa fichaxe de independentes, e que grazas ao "excelente "traballo realizado nos últimos anos, "seguiremos evitando ese obxectivo dos socialistas de derrubar o PP e de xubilarme".
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario