Acto durante o encontro

Eu ou Nós?, foi unha oportunidade para se encontrar e coñecer cales son as necesidades, proxectos e expectativas que dentro da nosa literatura teñen @s nov@s creadores/as, pois, se ben na actualidade vivimos en sociedades onde a liña que separa o Eu do Nós é cada vez máis grosa, non esquecemos que a palabra segue a ser signo referente á hora de enmarcar a nosa identidade.

Na primeira das mesas redondas celebrada nesta derradeira xornada, “(Auto)edición: a mirada do libro de autor”, coordinada por Antía Otero, Baldo Ramos falou das súas experiencias como confeccionador de libros de artista, nos que mestura a obra escrita, a súa poesía, con aspectos máis visuais, máis gráficos, á vez que analizou as posibilidades e limitacións que teñen este tipo de obras.

Pola súa banda, a diseñadora gráfica Uqui Permui, ademais de dar conta do seu Proxecto-Edición e de Entrecruzar, e doutros exemplos de edición máis recentes como o libro de artísta de Carme Nogueira, ou o magazine 0032, defendeu as posibilidades para a (auto)edición, afirmando que a simple fotocopia pode ser, como ten demostrado, subversiva e un excelente canle de comunicación. Sinalou, igualmente,  a importancia e crecemento que están tendo as “edicións alternativas”, grazas as posibilidade da rede: dende festivais e exposicións, librarías on-line especializadas neste tipo de publicacións a enlaces que existen entre os propios editores, artistas, escritores e deseñadores vinculados a elas.

Francisco Castro coordinou a segunda mesa, “O peso da nación”, na que interviron María Lado, Estíbaliz Espinosa e Séchu Sende. O autor Séchu Sende considerou falso o debate entre literatura comprometida ou non comprometida, dado que, segundo afirmou, á hora de crear buscase unha tensión creativa intentando vencer poderes como poden ser a morte, o desamor e a inxustiza. Abogóu, igualmente, por atopar espazos para a escrita reintegracionista, para unidas unhas e outras normativas, tirar do carro da nosa lingua.

Estíbaliz Espinosa, pola súa banda, considerou que a literatura e o peso literario sempre debe estar por diante do peso da nación porque, de non ser así –sinalou- sería moi fácil saber que temos unha boa obra literaria entre máns só porque aborde o tema da nación, o cal salientou que é importante pero non suficiente, porque ese feito por sí só non marca a calidade literaria.

O IV Encontro de Novos Escritores clausurouse na Fundación Luis Seoane da Coruña cun recital poético musical no que interviron Eduardo Estévez, Alicia Fernández, Antía Otero, Mario Regueira e Elvira Riveiro, e o Colectivo Oruga.

TrackBack URI para este comentario

Comentarios (0)

RSS feed comentarios

Mostrar/Ocultar formulario de comentario