 Manuel Vázquez, Feijóo e Guillerme Vázquez Nesta reunión, que presumiblemente terá lugar a próxima semana, preténdese analizar os informes emitidos polas entidades financeiras e tanto a Xunta como as demais forzas políticas indicarán o seu criterio ao aspecto. "Explicaremos definitivamente a posición da Xunta", dixo o presidente galego, Alberto Núñez Feijóo, tras un encontro de dúas horas e media cos líderes do PSdeG e BNG, Manuel Vázquez e Guillerme Vázquez, respectivamente. O dirixente autonómico incidiu na idea de que "solvencia e galeguidade" son os únicos elementos que "nos comprometen" e, neste sentido, augurou que a posición da Xunta, xa que se axustará a ese marco, "será coincidente se non ao 100% si ao 99%" coa de socialista e nacionalistas, aos que convocará unha vez conclúan os traballos entre as caixas e a Consellería de Facenda. Os reiterados conceptos de solvencia e 'galeguidade' son os criterios que darán lugar a que "aceptemos ou rexeitemos" os informes das caixas. "Se os manteñen aceptaremos" pero, do contrario, a resposta da Xunta será un "non", explicou Feijóo, quen aludiu aos mesmos como "únicos" criterios que determinarán a "posición política". O presidente autonómico opina que este asunto require que se adquira "unha estratexia de país", consisten en manter a Galicia no mapa "financeiro español" e tamén en que as caixas "evolucionen e non queden estáticas". Para logralo, implicou "ás institucións", e en concreto "ás caixas", ás que advertiu que os seus posicionamentos "teñen que ser pensando en Galicia". Feijóo asegurou que a reunión mantida "contribuirá á toma de posición da Xunta claramente", xa que as tres organizacións políticas con representación parlamentaria están "de acordo en que as caixas deben tomar unha decisión" e en que "o Goberno galego ten que explicitar o seu posicionamento".
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario