 Sonia Verdes Na mesma liña que o voceiro nacional do BNG, Guillerme Vázquez, a deputada socialista esixiulle ao presidente da Xunta de Galicia que asuma “persoalmente” a xestión deste conflito laboral, que pode deixar na rúa a máis de cen persoas, e comprometa o “apoio institucional” da Administración autonómica á iniciativa das cooperativas galegas. Segundo Sonia Verdes, “non temos conselleiro de Medio Rural”, porque nos últimos meses foi incapaz de pronunciarse con respecto ao proxecto que lle puxeron sobre a mesa as cooperativas, a pesar de que “sabe que contan co apoio do IGAPE e das entidades financeiras galegas”. Desde o seu punto de vista, ese comportamento por parte de Samuel Juárez agocha a súa verdadeira intención, permitir que “pase o 4 de decembro”, de xeito que “a fábrica quede libre de cargas laborais” e poidan poxar por ela outras “opcións máis interesantes para el”, como pode ser “o caso de Nova Rumasa”. Proposición non de lei Ao seu xuízo, a Xunta de Galicia está deixando “sos” aos traballadores de Pascual ante o seu incerto destino, polo que o Partido Socialista presentará, para o seu debate no próximo Pleno do Parlamento galego –que será o vindeiro mércores, 25 de novembro-, unha proposición non de lei na que insta ao Goberno autonómico a apoiar o proxecto das cooperativas, co obxectivo final de encontrar unha solución ao peche por tempo indefinido da factoría de Outeiro de Rei. Verdes asegurou que o PSdeG-PSOE está disposto a “esgotar todas as vías” e a facer todos os “esforzos necesarios” para que a Xunta de Galicia séntese a falar cos promotores desta iniciativa e cos propios traballadores de Pascual, “que levan meses esperando para reunirse co conselleiro de Medio Rural”. Por iso, xa anunciou que os socialistas tamén participarán “activamente” nos actos de protesta organizada polo comité de empresa. Plaxio Con respecto ao outro proxecto que ten enriba da mesa a Xunta de Galicia, o que lidera “A Arzuana”, Sonia Verdes afirma que se trata dun “plaxio ”, porque esa cooperativa “abandonou” a fronte común que lidera Feiraco. Por iso, opina que “non ten viabilidade”, aínda que ao Goberno galego “lle gustase, por motivos políticos”.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario