 Voluntarios limpando o chapapote O secretario executivo de Adega, Fins Eirexas, asegurou que das 80.000 toneladas de residuos inicialmente destinadas ás Somozas, na actualidade permanecen 10.000 "acumuladas" en "balsas improvisadas nun primeiro momento" e "sine die", esperando a ser tratadas. Aínda que Eirexas confiou en que este fuel permaneza "nas condicións axeitadas", indicou que a premisa inicial de ser "tratados rapidamente" non se cumpriu e "a día de hoxe permanecen amontoados" na planta mentres "Xunta e Estado pásanse a pelota" sobre o custo desta actuación. Nesta liña, Eirexas pediu que se lle dea un "final a este tratamento", no que "só se recicla o 3 por cento" dos residuos recollidos, mentres que o restante "hai que desfacerse del mediante incineración ou outros medios porque son residuos tóxicos". "A Xunta pretende ollar para outro lado e eludir responsabilidades", indicou o secretario executivo de Adega, que acusou o Goberno de alongar o proceso por reclamar fondos ao Estado para o tratamento dos residuos. Efectos a longo prazo Cando se cumpre o sétimo aniversario do accidente do Prestige, Fins Eirexas mostrou a súa preocupación polos efectos "crónicos e a longo prazo" da presenza de fuel na costa galega, xa que "estes contaminantes son acumulativos nos organismos vivos" e ao longo da cadea trófica recaen nos consumidores de peixes e mariscos. Nesta liña, e aínda que asegurou que a "gran capacidade de recuperación da costa galega" provocou que se superase a "fase aguda", Eirexas criticou que "ata agora practicamente non hai feitos estudos serios" sobre os efectos a longo prazo da contaminación do Prestige.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario