Vivimos nun mundo onde as contradicións están á orde do día. Din que imos progresando, que os avances científicos nos van facilitar a vida, sen embargo logo atopámonos que eses mesmos avances científicos serven para que as multinacionais (que son as que mandan neste puñetero mundo, non teñan a menor dúbida) se encarguen de apropiarse deses avances para levar a auga á súa canle, que endexamais vai coincidir coa nosa.

A proba máis recente témola coa vacina contra a xa famosa Gripe A. Segundo informes de varias fontes, a empresa que dispón desa vacina foi a mesma que provocou a alarma sobre unha suposta pandemia  presentando con trampa a valoración médica que ía de 0 a 6 ( un nivel 6 sería pandemia) informando que a situación estaba en nivel 5; claro que non dixo que esa forma de baremo fora cambiada e agora ía de 0 a 10, o que significa que o nivel cinco non ten a valoración que lles interesaba dar. A venda de millóns de vacinas a partires de asustar aos gobernos de tódolos países xa estaba asegurada. Por outra banda, diversos países están sufrindo desbordamentos de auga que causan múltiples estragos en vivendas e terreos de labor; sen embargo, un informe feito por 2.700 científicos asegura que no 2025 , debido ao quentamento global, non terán acceso a auga máis de 3.000 millóns de seres humanos. Que se está a facer para paliar este futuro desastre? Mentres nós andamos apurados para encher o depósito dos automóbiles, cada día máis caro, as empresas petroleiras seguen gañando cartos a moreas. A Royal Dutch Shell (anglo-holandesa) tivo en 2008 uns beneficios de 26.000 millóns de dólares. A Exxon Móvil (petroleira USA) gañou 45.000 millóns. A británica BP gañou 21.000 millóns, e así ata o infinito. Un dato moi curioso. A inspección fiscal española, en 2008,  descubriulle aos pequenos contribuíntes 4 millóns de euros; aos grandes capitais 125.000 euros. Qué listos son, non si? E con todo isto, o orzamento militar dos países da OTAN segue crecendo; deben prever algún tipo de guerra fría ou quente, que máis dá. Respecto ao total mundial, en 1985 representaba o 45%, logo en 1995 xa era do 58% e finalmente en 2008 representa o 70% do total mundial; segue nunha progresión semellante a como aumenta a fame no mundo; curioso.. Non lles vou dar máis a vara, pero ás veces faise preciso que saibamos como gastan os nosos impostos estes señores que din estar traballando polo noso benestar.

TrackBack URI para este comentario

Comentarios (0)

RSS feed comentarios

Mostrar/Ocultar formulario de comentario