 Alberto Gago Gago valorou os últimos acordos acadados polo Consello de Universidades e destacou que o cambio normativo “onde se pedía unanimidade agora se pide maioría” permite “acadar os acordos” porque “non casaba a normativa anterior cos usos actuais” e “todos eramos conscientes de que ou cambiabamos isto ou non había forma de progresar”, dixo. O reitor da Universidade de Vigo sinalou que os acordos acadados no campus de Ourense supuxeron a aprobación da substitución “de Físicas por Ciencias Ambientais” así como a “transformación do ADE polo título de Consultoría e Xestión da Información” que “non tropeza con ningunha outra proposta de transformación no sistema universitario de Galicia” polo que a titulación é “exclusiva”, engadiu. Na mesma liña, destacou que a transformación en Lugo da titulación de Ciencia e Tecnoloxía dos Alimentos en Nutrición “significa tamén para Ourense que se queda con Tecnoloxía dos Alimentos como titulación exclusiva do sistema ”. O reitor da Universidade de Vigo manifestou que o resultado é “satisfactorio” porque o Consello Galego “asume as propostas que presentou esta Universidade” pero en particular para o Campus de Ourense “o resultado é un pouco máis satisfactorio aínda” porque supón “pasar de non ter ningunha titulación exclusiva en Galicia a ter tres”, manifestou. Para Alberto Gago, que o Campus de Ourense conte en exclusiva coas titulacións de Ciencias Ambientais, Consultoría e Xestión da Información e Ciencia Tecnoloxía dos Alimentos é “unha condición fundamental para o futuro de calquera Campus periférico”, sinalou. Ademais, considera que se pasan todos os procesos burocráticos durante os meses vindeiros, as tres titulacións estarán operativas o próximo curso 2010.
Trackback(0)
 |
TrackBack URI para este comentario
RSS feed comentarios
Mostrar/Ocultar formulario de comentario