O mitin antiforal realizado en Tomiño no ano 1909, do que fixo un século o 20 de xuño pasado, coido que ten unha significación especial, aínda que daquela pode que non se lle dera máis importancia que a tantos outros que se estaban a facer por todo o país, por iniciativa do Directorio Antiforal de Teis e outras organizacións. No só se trata do primeiro mitin rural que fai o Directorio se non que asemade, como nos di JA Durán (no seu libro Agrarismo y movilización campesina en el país gallego 1875-1912), Xacinto Crespo abre os discursos e, por vez primeira nesta campaña, emprega o galego, e a outra novidade será que unha muller, Carmen Álvarez, diríxese á numerosa concorrencia feminina.