Nestes momentos, cando nos dispoñemos a escribir unha editorial, son tantos os temas quentes sobre os que nos apetece falar que resulta difícil a elección. Por iso, sen deternos demasiado imos facer unha composición variada con distintos temas, só a modo de numeración. Os políticos andan a leñazos dialécticos e serían dos outros se a ocasión fose máis apropiada; cando os oíntes das súas verbas lles replican con palabras fortes, densas, saben sacarse do peto unha “peineta” e mostrala cun alarde de técnica insuperable.

Hoxe podemos dicir aquí, diante desta audiencia especial e xenerosa, a xa famosa frase de Arquímedes: “Eureka”. El saíu da bañeira, segundo din, espido, e correu polas rúas de Siracusa berrando emocionado “Eureka! Eureka!”, logo de descubrir o fundamento do chamado “principio de Arquímedes”.

Nos medios de comunicación non diarios existen datas que teñen un valor especial. Sacar á rúa, hoxe coa que está caendo, un xornal-revista coma este é toda unha ousadía; chegar ao número cen podemos consideralo como unha proba da súa consistencia, acadar os 500 números editados xa entra no mundo dos milagres. Claro que todas estas cousas sempre teñen un aquel.

Estamos no tempo do galego. Non só porque nos lembra ás noites de inverno á beira do lume, contando e escoitando contos de todo tipo; sobre todo eses contos e lendas de Galicia que non sei por que sempre levan na súa levadura algo erótico, algo sexual. Creo que aínda non se fixo o diccionario galego de vocábulos e frases que teñan que ver co sexo nas entrañas deste País. Tamén estamos en tempos do galego porque nestes momentos desatouse unha corrente e contracorrente, co idioma como eixo principal, que non se dera en toda a existencia desta bendita terra galega.