O PSdeG votará finalmente a favor da reforma da Lei do Solo no próximo pleno da Cámara, toda vez que o grupo popular mostrou a súa disposición a cambiar a redacción do artigo 39 sobre protección de espazos naturais. Así o anunciou a voceira de ordenación territorial do grupo socialista, Mar Barcón, quen mostrou a satisfacción do seu grupo polo acordo aceptado, que "protexe os espazos naturais e zonas como Touriñán e impide a realización das plantas de acuicultura".

A Consellaría de Presidencia seguiu os pasos do Parlamento de Galicia ao presentar ante o Tribunal Constitucional (TC) as súas alegacións en contra do recurso formulado polo Goberno central en contra da lei de caixas galegas. Ante o parón que sofren as negociacións con Moncloa para lograr a retirada da impugnación, a Xunta remitiu ao alto tribunal un documento de 120 páxinas en que expón os argumentos legais que "avalan a constitucionalidade" dos once puntos da norma galega cuxa adaptación á Lei de Órganos Reitores das Caixas de Aforros (Lorca) puxo en entredito o Goberno central.